راستے جو بھی چمکدار نظر آتے ہیں

راستے جو بھی چمکدار نظر آتے ہیں

سب تیری اوڑھنی کے تار نظر آتے ہیں

کوئی پاگل ہی محبت سے نوازے گا مجھے

آپ تو خیر سمجھدار نظر آتے ہیں

میں کہاں جاوں کروں کس سے شکایت اس کی

ہر طرف اس کے طرفدار نظر آتے ہیں

زخم بھرنے لگے ہیں پچھلی ملاقاتوں کے

پھر ملاقات کے آثار نظر آتے ہیں

ایک ہی بار  نظر پڑتی ہے ان پر تابشؔ

اور پھر وہی لگاتار نظر آتے ہیں

زبیر علی تابشؔ

پوسٹ: محمد سہیل عارف معینیؔ