زائرِ کوئے جناں آہستہ چل

زائرِ کوئے جناں آہستہ چل

دیکھ آیا ہے کہاں آہستہ چل

جیسے جی چاہے جہاں میں گھوم پھر

یہ مدینہ ہے یہاں آہستہ چل

نقشِ پائے سیدِ کونین کی

ہر طرف ہے کہکشاں آہستہ چل

حاضری میں ہیں ملک ستر ہزار

قدسیوں کے درمیاں آہستہ چل

بار گاہِ ناز میں آہستہ بول

ہو نہ سب کچھ رائیگاں آہستہ چل

دیکھ لوں جی بھر شہرِ مصطفےﷺ

میرے میرِ کارواں آہستہ چل

در پہ آیا ہوں بڑی مدت کے بعد

اے میری عمرِ رواں آہستہ چل

جالیوں کے سامنے جلدی نہ کر

وہ ہیں نازش مہرباں آہستہ چل