تیری یاد عبادت میری
میں ہنجواں دی کراں تسبیح
اکھ جدوں دی اے سجناں توں پھیری
میں ہنجواں دی کراں تسبیح
دن جدوں ڈبدا شاماں جدوں پیندیاں
تیریاں اڈیکاں بیبا جان کڈ لیندیاں
جان تیریاں دکھاں نے ساڈی گھیری
میں ہنجواں دی کراں تسبیح
تیرے باہجوں کون ساڈے درد ونڈاوے گا
تینوں وی خیال چناں کدی ساڈا آوے گا
مینوں عید وانگوں دید چنا ں تیری
میں ہنجواں دی کراں تسبیح
رب دی سونہ جدوں دا وچھوڑا پے گیا اے
چین تے قرار ساڈا دکھاں ٹھگ لیا اے
اگ لائی توں جدائی دی بتھیری
میں ہنجواں دی کراں تسبیح
آساں والے قافلے وچھوڑیاں نے لٹے نے
ہوکیاں نے صدراں دے پھل ساڑ سٹے نے
جھلی درداں دہ سجناں ہنیری
میں ہنجواں دی کراں تسبیح
تو کی ماہیا رسیوں بہار رس گئی اے
تاہنگاں تے اڈیکاں میری جان کڈھ لئی اے
بلے دل وچ دکھاں والی ڈھیری
میں ہنجواں دی کراں تسبیح
دل خانے کعبے واہنگوں دل نئیوں توڑی دا
لکھ پیا موڑے جگ مکھ نئیوں موڑی دا
شان سجناں دی پاشا جی اچیری
میں ہنجواں دی کراں تسبیح
how to earn real money by investing amount... trusted website
ReplyDeletehttps://www.thenationalduty.com/2020/09/b4u-global-how-earn-money-from-home.html