جو لکھا ہے میرے نصیب میں اسے ماہ و سال پہ چھوڑ دو: مجھےچاہ اس کی عزیز ہے مجھے میرے حال پہ چھوڑ دو: میرا ایک لفظِ دعا نظرؔ ہے خلوص سے تو یہی بہت: حمید حیات نظؔر

 

جو لکھا ہے میرے نصیب میں اسے ماہ و سال پہ چھوڑ دو

مجھےچاہ  اس کی عزیز ہے مجھے میرے حال پہ چھوڑ دو

 

انہیں جذب و عشق کی کیا خبر انہیں سوز و ساز کا کیا پتہ

میرے ناصحوں کو نہ کچھ کہو انہیں قیل و قال پہ چھوڑ دو

 

رہِ عشق میں تو خیالِ سود وزیاں کا آنا محال ہے

یہ جنون ہے تو کشا کشِ ہجر و وصال پہ چھوڑ دو

 

میرا اپنے رب سے ہے معاملہ تجھے اس سے کیا میرے ناصحا

مجھے معاف کر دے یا بخش دے میرے انفعال پہ چھوڑ دو

 

مجھے مت بتا میرے ناصحا کہ عبادتوں کا  بدل ہے کیا

مجھے آخرت میں عطا ہو کیا اسی بے مثال پہ چھوڑ دو

 

میں تو خاک ہی کا خمیر ہوں مجھے خاک ہونا ہے ایک دن

جو ہے روزِ حشر کا معاملہ اسے لازوال پہ چھوڑ دو

 

میرا ایک لفظِ دعا نظرؔ ہے خلوص سے تو یہی بہت

وہ کریم بھی ہے رحیم بھی میرے اک سوال پہ چھوڑ دو

حمید حیات نظؔر