خرد برائے جہاں اور دل برائے عشق:: اذاں کے ساتھ ہمیں دی گئی صدائے عشق

 

خرد برائے جہاں اور دل برائے عشق

اذاں کے ساتھ ہمیں دی گئی صدائے عشق

 

تجھے جلانا نہیں اور تجھ میں جلنا نہیں

کہ دیکھنا ہے تجھے ہو کے ماورائے عشق

 

ہمارا کعبہ و قبلہ ہے خوش خرامیٔ دوست

نماز دائمی قائم زمین جائے عشق

 

خدا کرے کہ بلندی سے کوئی بھی نہ گرے

خدا کرے کہ کسی کو نہ آزمائے عشق

 

اک ایسا مصرعۂ تر ہو کہ جس سے خوں ٹپکے

اک ایسا شعر جسے دل سے گنگنائے عشق

 

کچھ ایسا ہو کہ اُ سے چھو کے مجھ کو آگ لگے

کچھ ایسا ہو کہ گلے سے مجھے لگائے عشق

 

ندیم عشق میں لالچ ہے چاہنا ایسا

کہ ہم سے روشنی پھوٹے ہمیں جلائے عشق

 

ندیم_بھابھہ