مُسّلَم ہے محمدؐ سے وفا ، صدّیقِ اکبر کی || منقبت سیدنا صدیق اکبر وضی اللہ تعالی عنہ || کلام پیر نصیر الدین نصیر شاہ رحمۃ اللہ تعالی علیہ

 

مُسّلَم ہے محمدؐ سے وفا ، صدّیقِ اکبر کی

نہیں بُھولی ہے دُنیا کو ادا ، صدّیقِ اکبر کی

 

 ہم اُن کی مدح گوئی داخلِ سنّت نہ کیوں سمجھیں

 نبیؐ تعریف کرتے تھے سدَا ، صدّیقِ اکبر کی

 

رسولُ اللہ کے لُطف و کرم سے یہ مِلا رُتبہ

مدد کرتا رہا ہر دَم خدا ، صدّیقِ اکبر کی

 

کلامُ اللہ میں ہے تذکرہ اُن کے محامد کا

زمانے سے بیاں ہو شان کیا صدّیقِ اکبر کی

 

 نجابت میں ، شرافت میں ، رفاقت میں ، سخاوت میں

ہُوئی شہرت یہ کس کی جا بجا ؟ صدّیقِ اکبر کی

 

 وہ خود اک صدق تھے کوئی اگر اِس رازکو جانے

صداقت ہی صداقت تھی صدا صدّیقِ اکبر کی

 

زمیں پر دُھوم ہےاُن کی ، فلک پر اُن کے چرچے ہیں

 زمین و آسماں پر ہے ثناء صدّیقِ اکبر کی

 

مؤرِخ دَم بخود ہے سَر بسجدہ ہے قلم اُس کا

تعالَی اللہ ! یہ شانِ عُلیٰ ، صدّیقِ اکبر کی

 

جو اُن کا ہے ، رسولُ اللہ اُس کے ہیں ، خدا اُس کا

 ولایت کا وسیلہ ہے ، وِلا صدّیقِ اکبر کی

 

 کمی کیسی نصیرؔ اُن کے مدارج میں ، مراتب میں

بڑی توقیر ہے نامِ خدا ، صدّیقِ اکبر کی