ہم پیکرِ جاناں کی دل پر تصویر اتارا کرتے ہیں || کلیاتِ نصیر سے انتخاب || کلام پیر نصیر الدین نصیرؔ شاہ صاحب رحمۃ اللہ تعالی علیہ

ہم پیکرِ جاناں کی دل پر تصویر اتارا کرتے ہیں

فرقت میں یہ قربت کا عالم ہر وقت نظارہ کرتے ہیں

 

دنیائے محبت میں دونوں یوں وقت گزارا کرتے ہیں

تم ذکر ہمارا کرتے ہو ہم ذکر تمہارا کرتے ہیں

 

ان کی طلب میں جب بھی ملے ،جو کچھ بھی ملے سر آنکھوں پر

دکھ ،درد ،مصیبت، غم، صدمہ، ہر چیز گوارا کرتے ہیں

 

فرقت کا مداوا آج نا   کل ، بس وعدۂ فردا  آئے دن

مرنے کا سبب بن کر گویا  جینے کا اشارہ کرتے ہیں

 

اس دام بلا کے حلقوں میں دل ہے کہ الجھتا رہتا ہے

وہ سامنے رکھ  کرآئینہ ، جب زلف سنوارا کرتے ہیں

 

گنگھور گھٹاوں کا موسم کوئل کی یہ کوکو پہ ہم

ساون کی چھما چھم جھڑیوں میں ہم تم کو پکارا کرتے ہیں

 

یہ عشق و وفا کی دنیا ہے ہم عشق و وفا کی دنیا میں

کرتے ہیں بسر انگاروں پر کانٹوں پہ گزارا کرتے ہیں

 

دل پر ہی فقط موقوف نہیں ہر شئے پہ تصرف ہے ان کا

کونین کا رخ پھر جاتا ہے جس دم وہ اشارہ کرتے ہیں

 

جو ہم سے خفا ہم ان پہ فدا ، یہ پریت کی دیکھی ہے ریت نئی

ہم ان کے سبب دیوانے ہیں ، جو ہم سے کنارہ کرتے ہیں

 

الفت بھی انوکھی بازی ہے، چال اسکی نصیؔر الٹی پلٹی

وہ ہار کے جیتا کرتے ہیں ، ہم جیت کے ہارا کرتے ہیں