میرے دل میں ہے یادِ محمد میرے ہونٹوں پہ ذکرِ مدینہ

 

میرے دل میں ہے یادِ محمد میرے ہونٹوں پہ ذکرِ مدینہ

تاجدارِ حرم کے کرم سے آ گیا زندگی کا قرینہ

 

ان کی چشمِ کرم کی عطا ہے میرے سینے میں ان کی ضیا ہے

یادِ سلطانِ طیبہ کے صدقے میرا سینہ ہے مثلِ نگینہ

 

میں غلامِ غلامانِ احمد میں سگِ آستانِ محمد

قابل ِفخر ہے موت میری قابلِ رشک ہے میرا جینا

 

ہر خطا پر مری چشم پوشی ہر طلب پر عطاؤں کی بارش

مجھ گناہ گار پر کس قدر ہیں مہرباں تاجدارِ مدینہ

 

مجھ کو طوفاں کی موجوں کا کیا ڈر یہ گزر جا ئیں گی رخ بدل کر

ناخدا ہیں مرے جب محمد کیسے ڈوبے گا میرا سفینہ

 

دل شکستہ ہے میرا تو کیا غم اس میں رہتے ہیں شاہ ِدو عالم

جب سے مہماں ہوئے ہیں وہ دل میں دل مرا بن گیا ہے مدینہ

 

دولتِ عشق سے دل غنی ہے میری قسمت ہے رشکِ سکندر

مدحتِ مصطفٰی کی بدولت مل گیا ہے مجھے یہ خزینہ