ہاڑہ وے جانی رات رہ پو hara ve jani lyrics | sofiana kalam | sufi meditation | sufi islam

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 من گِھن وے من گِھن رہ پو اتھائیں

قسم خدا دی سکدیاں نے جائیں

لوں لوں سنگیری ڈیسی دعائیں

مَنتاں منیاں ہم پیراں پچائی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

سٹ سیج خالی ونجنڑاں وفا نئی

ایہا رات رہ پو، ایہہ کوئی خطا نئی

دل دا ملاون، ایہہ کوئی گناہ نئی

رب جانڑ دا ہے جئیں آپ لائی اے

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

رہسی ایہا درد ہر آن دل وچ

قسمت جگالیں ارمان دل وچ

رہسی قبر تک پیکان دل وچ

میں جاں وچھائی اے جانی کنڈھ ولائی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

روزِ ازل دی تیڈی ہُلّیِ ہاں

سک لے کے سینے جنگلیں رُلی ہاں

لکھاں دی ہامیں ہنڑ بے مُلی ہاں

رب جانڑں دا ہے جیڑھی میں نبھائی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

اج کل دی نئی گال میں ہاں دور دی مٹھڑی

ڈٹھڑا نہ ہم ڈھول، نہ سن کے مٹھڑی

جاون والی رات لائی عشق گھٹڑی

میں کرماں ماری دی قسمت وہائی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

زوری جے ویسو ونجنڑ نہ ڈیساں

گل پا کے پلڑو منتاں کریساں

پیراں فقیراں دے ناویں دِویساں

سکدی کوں معراج والی رات آئی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

جیندی ودی ہاں سوہنا تیڈے ساہ تے

اج تئیں نہ ڈٹھڑا تیں کنڈھ ولا کے

گھر زر لٹایم سوہنا تیڈے راہ تے

بے کس کوں دنیا وچ تیڈی دہائی ہے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

ساری سنڑیساں گزری ویہانی

درداں دے قصے غم دی کہانی

قسمت بھرائیم در در دا پانی

تیڈے ذمے نہیں اساں آپ لائی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے

 

صابرؔ لگی پریت اصلوں نہ توڑیں

سر تئیں سہی جا مردے نہ چھوڑیں

ایہا پیت لوڑیں پر سک نہ چھوڑیں

ایہا پیت دی رِیت نازک سکھائی اے

 

ہاڑہ وے جانی رات رہ پو سانگا خدائی اے

متاں ول نہ ٹکروں ، جندڑی پرائی اے